बाय चाल्या छ भंवर जी पींपळी जी, हांजी ढोला हो गई घेर घुमेर, बैठण की रुत चाल्या चाकरीजी, ओजी म्हारी सास सपूती रा पूत, मत न सिधारो पूरब की चाकरी जी। हां जी ढोला होए गया बारह मास।
परण चाल्या छा भंवर जी गोरड़ी जी, हांजी ढोला हो गई जोध जवान, विलसण की रुत चाल्या चाकरीजी।ओजी म्हारी लाल नणद बाई रा बीर, मत न सिधारो पूरब की चाकरी जी।
कुण थारां घुड़ला भंवर जी कस दिया जी, हांजी ढोला कुण थानै कस दीनी जीन। कुण्यांजी रा हुकमा चाल्या चाकरीजी, ओजी म्हारे हिवड़े रा नौसर हार, मत न सिधारो पूरब की, चाकरी जी।ओजी म्हारी सास सपूती रा पूत,
रोक रुपैया भंवर जी मैं बणूं जी, हांजी ढोला बण ज्याऊं पीळी पीळी म्होर। भीड़ पड़े जद सायबा बरत ल्योजी, ओजी म्हारी सेजां रा सिणगार। पिया की पियारी ने सागे ले चलो जी।ओजी म्हारी लाल नणद बाई रा बीर।
कदेई न ल्याया भंवर जी चूनड़ी जी, हांजी ढोला कदेई न करी मनवार। कदेई न पूछी मनड़े री वाता जी, हांजी म्हारी लाल नणदबाई रा बीर, थां बिन गोरी नै पलक ना आवड़े जी ।।ओजी म्हारी लाल नणद बाई रा बीर।
बाबोसा नै चाये भंवर जी, धन घणो जी। हांजी ढोला कपड़े री लोभण थारी माय। सेजां री लोभण उडीकै गोरड़ी जी, हां जी थारी गोरी, उड़ावै काळा काग। अब घर आओ, धाई थारी नौकरी जी । ओ जी म्हारे हिवड़ा रा नोसर हार।
जोबन सदा नां भंवर जी थिर रवे जी। हांजी ढोला फिरती घिरती छाँव। कुळ का तो बाया मोती निपजे जी, ओजी थारी प्यारी जोवै बाट। जल्दी पधारो गोरी रे देस में जी।।ओजी म्हारी लाल नणद बाई रा बीर।
बाय चाल्या छा भंवर जी पींपळी जी, हांजी ढोला हो गई घेर घुमेर, बैठण की रुत चाल्या चाकरीजी, ओजी म्हारी सास सपूती रा पूत, मत न सिधारो पूरब की चाकरी जी।।
Naye Naye Bhajan Lyrics 