सँयों कुळ म ए फुलड़ा दोय बड़ा,सँयों एक सूरज दूजो चाँद बधावो जी म्हारी गवरां रो।
सँयों सूरज की किरणां तपे,सँयों चाँदा री निरमल रात बधावो जी म्हारी गवरां रो।
सँयों कुळ म ए फुलड़ा दोय बड़ा,सँयों एक घोड़ी दूजी गाय बधावो जी म्हारी गवरां रो।
सँयों गायां रा जाया बाछया हळ बेव,सँयों घोड़ी रा जाया ढ़ाबे राज बधावो जी म्हारी गवरां रो।
सँयों कुळ म ए फुलड़ा दोय बड़ा, सँयों एक सायब दूजो बीर बधावो जी म्हारी गवरां रो।
सँयों बिरोजी उढावे नोरंग चुनड़ी,सँयों सायब जी रो सरब सुहाग बधावो जी म्हारी गवरां रो।
सँयों कुळ म ए फुलड़ा दोय बड़ा,सँयों एक मायर दूजो बाप बधावो जी म्हारी गवरां रो।
सँयों माउजी र औदर लोटिया,सँयों बापूजी लडायो म्हांनै लाड बधावो जी म्हारी गवरां रो।
सँयों कुळ म ए फुलड़ा दोय बड़ा,सँयों एक सूरज दूजो चाँद बधावो जी म्हारी गवरां रो।