Leto jajye re Bai sugna Bai ra bira sandesho mharo,बाई सुगणा बाई रा बीरां हो संदेशो म्हारो लेतो जाज्ये,ramdev ji bhajan

लेतो जा ज्ये रै बीरां लेतो जा ज्ये
लेतो जा ज्ये रै बीरां लेतो जा ज्ये
बाई सुगणा बाई रा बीरां हो संदेशो म्हारो लेतो जाज्ये।

पहलो – पहलो परचो माता मैणादे नै दीनयो
दुखड़ो माता रो बाबो सारो हर लिनयो
उफणतो दूध थमातो जा ज्ये
बाई सुगणा बाई रा बीरां हो संदेशो म्हारो लेतो जाज्ये।

दूजो – दूजो परचो बाबो बिंणजारे नै दीनयो
दुखड़ो बिणजारे रो बाबो सारो हर लिनयो
मिसरी को लूण बणातो जा ज्ये
बाई सुगणा बाई रा बीरां हो संदेशो म्हारो लेतो जाज्ये।

तीजो – तीजो परचो बाबो बोयता नै दीनयो
दुखड़ो सेठां रो बाबो सारो हर लिनयो
डुबयोड़ी नयाव तिरातो जा ज्ये
बाई सुगणा बाई रा बीरां हो संदेशो म्हारो लेतो जाज्ये।

चौथो – चौथो परचो बाई सुगणा नै दीनयो
दुखड़ो बहणा रो बाबो सारो हर लिनयो
अमृत रस बरसातों जा ज्ये
बाई सुगणा बाई रा बीरां हो संदेशो म्हारो लेतो जाज्ये।

पांचों – पांचों परचो पाँचू पीरां नै दीनयो
दुखड़ो पीरां रो बाबो सारो हर लिनयो
झोळी – झंडा ल्याय गिरातो जा ज्ये
बाई सुगणा बाई रा बीरां हो संदेशो म्हारो लेतो जाज्ये।

छटो – छटो परचो बालक नाथ जी नै दीनयो
दुखड़ो संता रो बाबो सारो हर लिनयो
कानां मैं कुंडल झलकातो जा ज्ये
बाई सुगणा बाई रा बीरां हो संदेशो म्हारो लेतो जाज्ये।